الفصام ( الضلالات الذهانية بين الأطباء و الشيوخ )

 


خلينا نتكلم بلغة بسيطة علشان نفهم الموضوع عندنا شخص كان عادي وفجأة بدأ يتصرف تصرفات غريبة ، يشك في الناس ، يحس أنه خارق أو موهوب موهبة نادرة مفيش حد غيره يقدر يعملها ، يقول انا المهدي المنتظر أو في ناس بتراقبني و المخابرات زارعة كاميرات علشان يتجسسوا عليا .

لو حطيت الشخص ده في مكان أهله مشافوش اعراض غريبة و حادة و بتطور بسرعة قبل كده هيحسوا بالخضة ويترجموا ده على أنه ربط أو عمل أو مس زى ما بنسمع و بنشوف .

بس في حقيقة الأمر كل دي ضلالات ذهانية المريض بيبقي مقتنع بيها فعلا و غير مستبصر و أي حد يحاول يصحح مفاهيمه بيسخر منه او يحاول يعتدي عليه .

وخلينا نبدء بتعريف الذهان او الفصام او الاضطراب الذهاني واللى بيكون سببه لغبطة عصبية معقدة و للتبسيط فيه خلل في مستقبلات و موصلات عصبية زي الدوبامين ( Dopamine )

وده بيسبب اعراض غريبة زي الهلاوس السمعية و البصرية و الحسية او الإحساس بالاضطهاد أو الإحساس بالعظمة أو اضطرابات النوم و الشهية أو عدم الاهتمام بالنظافة الشخصية والواجبات الحياتية و محاولة العزلة عن الناس و الخوف من التجمعات و غيرها من الاعراض .

اللي عايزين نقوله انها اعراض تخض بس ربنا قال

(فاسألوا أهل الذكر ان كنتم لا تعلمون )

وأهل الذكر في الحالة دي هم الأطباء النفسيين و الدليل علي كده ان مع العلاج الاعراض دي بتتحسن كتير بفضل الله

أما موضوع الشيوخ فهتكلم عنه في شقين :

الشق الأول : انها مجرد دائرة انكار باعتبار ثقافة الاضطراب النفسي وصمة في مجتمعنا

زي مثلا لما حد يقول ليه هو انا مجنون بجانب المعلومات المغلوطة عن الأدوية النفسية بالإضافة الي أن الطب النفسي فيه تشخيصات كتير و كل واحد يختلف عن التاني سواء في مدة العلاج او الطريقة زي أي تخصص في الطب .

فبيبدأ المريض و أهله يلجأوا للروحانيات كمحاولة لايجاد حل .

الشق التاني : أن اكيد كلنا أما بنسمع قرآن أو أذكار بنرتاح بس ده مجرد شئ مؤقت و ليس الحل المطلوب و الدليل ورود مرضي للعيادات بعد لفها علي الشيوخ و عدم وجود حل .

الأخطر من كده أن الموضوع ممكن يكون مؤذي اكتر مع بعض الجهلاء مدعين المعرفة وعلي سبيل الذكر كان عندي مريضة بتتعالج من كرب ما بعد الصدمة (PTSD)

بسبب انها مش قادرة تنسي الضرب علي الضهر و الرجلين و محاولة كهربتها من الشخص الدجال اللي اهلها ودوها ليه .

حاجة اخيرة عايز اقولها ولنفترض ان الموضوع مش طبي .

انت لو قرأت أذكار الصباح و المساء مش هتحتاج لحد و الحديث بيقول ( من اصبح و امسي يقولهم لم يمسه مس ولا سحر )

انا طولت عليكم شوية في البوست بس أتمني نكون وصلنا الفكره بطريقة مبسطة و ربنا يكتب الشفاء و العافية للجميع

#الطب_النفسي_مش_وصمة

دائما في خدمتكم ❤️

°° د.هشام الشافعي °°

تعليقات

المشاركات الشائعة من هذه المدونة

اضطراب الاعراض الجسدية النفسية

نصح المريض بالتقرب من الله