حوادث التحرش و كيفية التعامل معها ..

 


حوادث التحرش و كيفية التعامل معها ...

السلام عليكم ويارب جميعاً بخير .

استكمالا لكلامنا قبل كده عن أفعال أسرية خاطئة

مهم جدا تشوفوه ☝️☝️

وتزامناً مع مشكلة واقعة و أزمة متصاعدة وهى حوادث التحرش

والتى قوبلت بما يليق بيها من غضب شعبى و استنكار عام وتم تناولها من جوانب متعددة

لعل أهمها جانب الحد منها عن طريق تغليظ عقاب المتحرش

واللي دائماً ما بيكون أول شي بيتبادر لأذهاننا عند مناقشة هذه القضيه .

بس النهارده حابين نتكلم معاكم علي جانب تانى بيغفل عنه معظمنا وهو الجانب الأسري.

واللي للأسف بدلا من أن يكون الحل لهذه الظاهرة بيكون مشارك في حالات كتير منها سواء بالفعل أو بتقبل هذه الحوادث.

و هضربلكم مثالين لحالات كتير مرت علينا :-

الحالة الأولى : حالة تم التعدى عليها من أحد أقربائها وعند اللجوء و اخبار الأهل كانت النتيجة هى الإنكار لأسباب اجتماعيه وتفضيل اسلوب دفن الرأس في الرمال

واللي زاد الموضوع سوء اتهام الحالة بأنها هى اللى شجعته علي الفعل ده

وده كان ليه ضرر كبير جدا عليها

الحاله الثانيه : حالة من عائلة ملتزمه جدا تم التحرش بها أكتر من مره

وعند اخبار الأهل كان الرد ( متتكلميش في الموضوع ده تانى احنا معندناش حد كده وأكيد بيتهيألك واكيد مش قصده واحنا مش كده )

والنتيجه كانت كره البنت للدين المتجسد في أشخاص و عائلة متشددة جاهلة في الأساس بأسسه و قيمه و كان ردها لو الدين بالشكل ده فاكيد مش عاوزاه .

لو بصينا للموقفين دول هنلاقي أننا دائما بنحط المسئولية علي المتحرش و بنهمل و نتناسي جانب أكبر وهو أننا بنضعف من شخصية أولادنا مخليينهم مبيقدروش يتكلموا تحاورنا معاهم بيبقي سلبي وده بيأثر وبيمنعهم من المواجهه اللى هتكون رادعة لمثل هذه الأفعال .

ولو تابعت البوست السابق عن أمثلة لمشاكل التواصل الأسري هتعرف أن الحاله بتكون من الضعف انها مش قادره تتكلم وده بسبب أن شخصيتها ضعيفه بسبب التواصل الأسري الخاطئ

فياريت لو عاوزين نحميهم فعلا نقرب منهم و نساعدهم ونعرفهم القواعد العامة للحماية .

وفي بعض الحالات لابد من تدخل الطب النفسى لتقييم و معالجة ضعف الشخصية الناتج عن التواصل الخاطئ لاستعادة الثقه و تعلم ثقافة المواجهة وقواعد الحمايه العامه .

في النهاية أرجو أن الرسالة تكون وصلت لهذا الجانب من موضوع التحرش ده بجانب تغليظ العقوبات بالطبع ولازم نعرف أهمية التواصل الصحيح وطرقه علشان نأهل أولادنا أنهم يكونوا بخير واثقين من نفسهم بيبحثوا عن الأفضل في كل مجالات حياتهم .

سلمكم الله من كل أذي .

دائما في خدمتكم ❤️

°° د.هشام الشافعي °°

اخصائي الطب النفسي وعلاج الادمان .

 

تعليقات

المشاركات الشائعة من هذه المدونة

اضطراب الاعراض الجسدية النفسية

الفصام ( الضلالات الذهانية بين الأطباء و الشيوخ )

نصح المريض بالتقرب من الله