اضطراب الاعراض الجسدية النفسية

 


السلام عليكم ويارب جميعاً بخير 

في البوست ده هنكلمكم عن اضطراب الاعراض الجسدية النفسية ( somatoform )

واللى بيتجسد في صورة احساس بالاختناق أو زى ما بنقول صدرى طابق عليا أو آلام جسدية متكررة في مناطق مختلفة

واللي بتخلينا نبدء مشوار البحث عن العله والمرور علي كل التخصصات من قلب و باطنة و صدر و عظام و علاج طبيعي واللي بعد عمل كل الفحوصات والأشعة المطلوبه بتكون النتيجة طبيعية ولكن الألم موجود ومستمر بدون اى تحسن

و هحكيلكم عن قصة حالة من الحالات اللى مرت علينا بتعانى من الاضطراب ده ( بعد استئذانه ) .

جالي مضطر لسبب يجهله و كل ما يعرفه انه راح لكل تخصص له علاقة بشكوته و عمل تحاليل كتير وأخد ادوية اكتر و بعد يأسه من التحسن قال اجرب الطب النفسي .

حضر الي العيادة ، تابع معانا ، التزم بالتعليمات والعلاج.

و بعد 6 شهور و في موعد المتابعة وشعور عارم من الاندهاش و السعادة آلام الحوض

التي لم تكن تفارقه بعد حادثة سابقة علي مدار خمس سنوات من العلاج و جلسات العلاج الطبيعي دون تحسن قد اختفت الان تماما .

و كانت اخر جلسة قولت له كده خلصنا كورس العلاج .

سكت شوية مع نظرات الاستغراب و قال « يعني انا كده خلاص هرتاح من الوجع ده و اعيش حياتي عادى تصدق يا دكتور انا في استاذ جامعة علاج طبيعي تابعت معاه 5 سنين

و قالي هتكمل جلسات ومفيش علاج الا عندي و لكن ملقتش اي تحسن » .

وتفسير اللي حصل وعرضناه عليكم بصوره مبسطة شوية أن الجسم فيه مستقبلات

اسمها ( السيروتونين و النورادرينالين ) موجودة في الجهاز العصبي بشكل اساسي

و في بقية اجزاء الجسم بكميات مختلفة و في اى حالة من حالات التوتر او الاكتئاب أو الضغط العصبي أو القلق تشبع المستقبلات دى بيقل بشكل كبير

وده بيكون سبب فى ظهور مجموعه من الاعراض زى :

احلام و كوابيس او ما يسمي بالجاثوم

نوبات الرهاب

الصداع النصفي المتكرر

الام شديدة بالجسم و الخمول و الاحساس بعدم القدرة علي انجاز الاعمال اليومية البسيطة

ولو خدنا قصة الحالة بتاعة وجع الحوض هنلاقي ان احساسه بها كان اقوي من الضرر الجسدي ، خوفه من العجز تُرجِم في صورة آلام متكرر ومع اخذ تاريخ مفصل و العمل على ان تصالحه مع الحادث و نفسه (صورته الذاتية ) اهم من الأدوية و جلسات العلاج الطبيعي توصلنا للنتيجة دي بفضل الله .

ملقتش اوضح من المثال ده لبيان أهمية هذا الاضطراب و اللي دايما بنقابل حالاته تدخل العيادة بكمية ضخمة من الأشعة و التحاليل و الروشتات .

و حينها يأتي دور الطبيب النفسي .

دائما في خدمتكم ❤️

°° د.هشام الشافعي °°

 

تعليقات

المشاركات الشائعة من هذه المدونة

الفصام ( الضلالات الذهانية بين الأطباء و الشيوخ )

نصح المريض بالتقرب من الله