هل تعاطي المخدرات ممكن يحولنى لمريض نفسي ؟

 


السلام عليكم ويارب جميعاً بخير

النهارده هنرد علي سؤال اتكرر معانا و قابلناه كتير « هل تعاطي المخدرات ممكن يحولنى لمريض نفسي ؟! »

وبغض النظر أن الطب بيعتبر الإدمان بحد ذاته مرض نفسي وده مش دا موضوع نقاشنا النهارده .

احنا هنتكلم معاكم عن ذهان التعاطي (Substance induced psychosis)

واللي بيكون عباره عن مجموعه من الأعراض المختلفه زى الهلاوس وضلالات الاضطهاد وضلالات الخيانة والشك الخطير في الاهل و الاقارب واللي ممكن يوصل للتوهم بالخيانة الزوجية واللى ممكن يترتب عليه الضرب والإيذاء والشك في نسب الاطفال وغيره من التوهمات اللي وردت علينا .

وممكن يصاحب كل ده شعور دائم بالقلق anxiety والاكتئاب depression

معلومة كتير مننا ميعرفهاش ..مواد و عقاقير ومخدرات كتير ممكن تسبب ذهان التعاطى بس الحشيش هو الأكثر انتشارا و كمان اكثر قوة عن باقي المواد كالترامادول والهيروين في إحداث الذهان .

لو بقيت مريض ذهاني ممكن تفضل تاخد دوا طول عمرك دا غير حجز الإدمان ورحلة التعافي اللى ممكن تفضل بعدها مريض نفسي بردو لو ملحقتش نفسك

ومع العدد الهائل من المصريين اللي بياخدوا حشيش باعتباره "عادي يعني زي السجاير، وتسالي وهي مرة كل فين وفين" الإحتمالات بتزيد .

و ملحوظة اكثر اهمية: ( الموضوع مالوش علاقة بالجرعة ولا بالمدة، في ناس ممكن تشرب طول حياتها ميحصلهاش حاجة وفي واحد ممكن يصاب بذهان التعاطي ..و تختلف من شخص للتاني ..ممكن يظهر بعد سنة ..ممكن بعد اكتر .. و احيانا و شوفناها ديه انه ممكن من بداية التعاطي اصلا )

طلب المساعدة مش عيب ومفيش وصمة عار وكل مريض وله قصته ولو عرفنا ازاي بنتعافي جسديا وفكريا ..واكيد النتيجه هتفرق كتييير..لما تعرف ايه اللي بيخليك تتعاطي او مشاعر ايه اللي بتطفيها ولا غيره ..ودا بيجي من تقييم وافي في الاول ..ودائما يد العون مع اي حد عايز يغير حياته ويستبصرلها كويس ..

التوعية بشكل كافي كفيله انها تقلل نسب التعاطى واللي دائما بتكون خطوة أولى للإقلاع عن الإدمان واللي هيكون أسهل باذن الله لو المبادرة للإقلاع كانت في المراحل الأولى .

و جزء مهم جدا في دور التوعية انكم تعرفوا وتعرّفوا دوايركم أن الحكاية قد لا تقتصر على علاج إدمان بس.

أكيد ممكن ننقذ حياة ناس كتير و ننقذ ذويهم .

و دائما في خدمتكم

°° د.هشام الشافعي °°

اخصائي الطب النفسي وعلاج الادمان .

 

تعليقات

المشاركات الشائعة من هذه المدونة

اضطراب الاعراض الجسدية النفسية

الفصام ( الضلالات الذهانية بين الأطباء و الشيوخ )

نصح المريض بالتقرب من الله